დაწყებითი კლასების კათედრა: ბუნება

I კლასი

მოსწავლეები ეცნობიან სასკოლო და საკლასო გარემოს, სასწავლო ნივთებსა და მათ დანიშნულებას, ეუფლებიან სასწავლო გარემოში ქცევისა და პირადი ჰიგიენის ელემენტარულ წესებს. ისინი შეისწავლიან ადამიანის სხეულის ნაწილებს, მცენარეთა და ცხოველთა მრავალფეროვნებას, წელიწადის დროებს, ამოიცნობენ მოძრავ და უძრავ საგნებს, ანსხვავებენ და აჯგუფებენ ბუნებრივ და ადამიანის მიერ დამზადებულ საგნებს, აკეთებენ კოლაჟებსა და ჩანახატებს, აცნობიერებენ შეგრძნების ორგანოებისა და შეგრძნების მნიშვნელობას გარემოს აღქმაში.

საგაკვეთილო პროცესში გამოყენებული აქტიური სავარჯიშოებისა და თამაშების საშუალებით ვითარდება აზროვნება, ნებისყოფა, თვითმართვა, ყურადღება, ხელის მოტორული უნარი.

II კლასი

მეორე კლასში მოსწავლეები საკუთარ გამოცდილებაზე დაყრდნობით გარემოში ორიენტირებასა და მის აღქმას იწყებენ. აღწერენ მცენარისა და ცხოველის ძირითად გარეგან ნაწილებს, შეისწავლიან სინათლისა და სითბოს წყაროებს. ახასიათებენ სეზონებს, ბუნებრივ მოვლენებს, მზეს, დედამიწასა და მთვარეს. ეცნობიან ქუჩაში უსაფრთხო მოძრაობის პირობით ნიშნებს, საყოფაცხოვრებო ნივთების უსაფრთხო გამოყენების ელემენტარულ წესებს. ინფორმაციას გადმოსცემენ მარტივი მოდელების, ჩანახატებისა და კოლაჟების საშუალებით.

საკლასო აქტივობები ხელს უწყობს, როგორც სწავლისადმი პოზიტიური დამოკიდებულების, ასევე მსჯელობის, დაკვირვებისა და მოტორული უნარების განვითარებას.

III კლასი

მესამე კლასში მოსწავლეები აცნობიერებენ კავშირს ცოცხალ და არაცოცხალ ბუნებას შორის, ახასიათებენ და აღწერენ მზის სისტემას, სეზონურ ბუნებრივ მოვლენებს, გეოგრაფიულ ობიექტებს, სხვადასხვა ორგანიზმების საარსებო გარემოს, გარემოსა და ადამიანის ურთიერთდამოკიდებულებას. მოსწავლეები აკვირდებიან მაგნიტის მოქმედებას, სხეულთა მოძრაობას. ატრებენ მარტივ ცდებს, აკეთებენ ჩანიშვნებს, რომელსაც ჩანახატებისა და ცხრილების საშუალებით წარმოადგენენ.

სასკოლო და საგაკვეთილო აქტივობები ემსახურება გარემოს უკეთ შეცნობას, კვლევითი და სააზროვნო უნარების განვითარებას, თანამშრომლობის ხელშეწყობას.

IV კლასი

მეოთხე კლასში მოსწავლეები შეისწავლიან და აღწერენ ორგანიზმების სასიცოცხლო ციკლს, ცხოველთა ქცევას, გარემოში ბუნებრივი მოვლენებით გამოწვეულ ცვლილებებს, გადაშენებულ ორგანიზმებს, მასწავლებელთან ერთად გეგმავენ და ატრებენ მარტივ ცდებს, გამოთქვამენ ვარაუდებს, ადგენენ ცხრილებს, აკეთებენ მოდელებს, იწყებენ რუკაზე მუშაობას, განსაზღვრავენ ჰორიზონტის მხაეებს, ატლასის გამოყენებით კონტურულ რუკაზე დააქვთ გამოჩენილი მოგზაურების მარშრუტები, საქართველოს მნიშვნელოვანი გეოგრაფიული ობიექტები.

სასწავლო აქტივობები და კვლევითი პროექტები ხელს უწყობს დადებითი მოტივაციის შექმნას, გარემოს უკეთ შეცნობას, აზროვნებასა და კომუნიკაციას.

V კლასი

მეხუთე კლასში მოსწავლეები შეისწავლიან ყვავილოვანი მცენარეების ძირითად ორგანოებს, იკვლევენ ყვავილის ძირითად ნაწილებს, ეცნობიან ხერხემლიანი ცხოველებს, ქმნიან მარტივ კვებით ჯაჭვებს, გამოთქვამენ ვარაუდებს, ატარებენ და აღწერენ ცდებს სხეულთა მოძრაობაზე დასაკვირვებლად, ადარებენ სინათლისა და ბგერის გავრცელებას, მსჯელობენ ენერგიის ფორმებისა და ენერგიის წყაროების შესახებ, ახასიათებენ ნივთიერების აგრეგატულ მდგომარეობებს, აღწერენ ბუნებაში მიმდინარე ციკლურ პროცესებს, გეოგრაფიულ იბიექტებს, სწავლობენ გარემოში ორიენტირებას, აკეთებენ შესაბამის სქემატურ ნახატებს.

სწავლის პროცესში მნიშვნელოვანი ყურადღება იქნება გამახვილებული კვლევით პროექტებზე, ჯანსაღი და უსაფრთხო ცხოვრების წესის მნიშვნელობის გაცნობიერებაზე, ბუნებისადმი მზრუნველი დამოკიდებულების ჩამოყალიბებაზე.